Gipahigayon sugod karong adlawa, Hunyo 2, 2026, ang duha ka adlaw nga “1st Quarter Municipal and City Corn Coordinators Meeting” alang sa lalawigan sa Sugbo diha sa Osmeña Boulevard, Dakbayan sa Sugbo. Ang maong tigom gitambongan sa mga Municipal Agriculture Officers (MAO), corn coordinators, ug mga agricultural technician gikan sa nagkadaiyang dapit sa probinsya.

Tumong sa maong kalihokan nga matuki ang nagkalain-laing isyu ug programa kalabot sa mais nga nakasentro gihapon sa pagpauswag sa panginabuhi ug kalamboan sa mga lokal nga mag-uuma.

Mitambong usab sa maong panagtigom si Regional Executive Director, Director Angel C. Enriquez, diin iyang gipauyonan ang kamahinungdanon sa pakigtambayayong ug kolaborasyon tali sa mga Local Government Units (LGU), MAO, corn coordinators, ug sa Department of Agriculture-Region 7 (DA-7). Sumala pa ni Director Enriquez, kini nga paningkamot gikinahanglan aron mapataas ang abot sa mais sa Sugbo, nga kabahin usab sa kinatibuk-ang plano para sa food security, dungan sa pagpaabot sa iyang dakong pasalamat sa walay undang nga suporta sa mga nahisgutan. Gidugangan usab kini ni APCO Marina Viniegas pinaagi sa pag-ila sa dako ug lig-on nga suporta nga naggikan mismo sa mga mayor sa LGU ug ingon man ang dakong tabang nga gihatag sa DA alang sa maong programa.

Sa laing bahin, gipahayag ni Provincial Corn Coordinator sa OPA Cebu Marya Zea A. Villaganas nga usa sa labing importante nga angay masabtan ug matuki karong panahona mao ang kahimtang o forecast sa El Niño phenomenon. Nagpasalamat usab si Villaganas sa kakugi ug sakripisyo sa mga mitambong aron sa pagpalawom sa kaalam sa industriya sa mais, ug sa pagmugna og mga dinalian nga lakang nga kinahanglang buhaton aron mapanalipdan ug matabangan ang mga mag-uuma sa probinsya batok sa umaabot nga hulga sa hulaw.