Aron mapalig-on ang industriya sa ubi sa Central Visayas, malampusong gipahigayon sa Department of Agriculture – Central Visayas (DA-7), pinaagi sa Research Division, ang Technical Briefing and Strategic Planning Workshop on the Yamang Ubi Project of Region VII, sugod kagahapon hangtud karong adlawa, Hulyo 15–16, 2026 sa Cebu City.
Gitambongan kini sa mga kawani sa DA-7 ubos sa mga research station ug sa High Value Crops Development Program (HVCDP), Assistant Provincial Agriculturist sa Bohol nga si Larry Pamugas, ug Ubi Expert sa Bohol Island State University (BISU) – Bilar Campus nga si Engr. Dennis Jomoc.
Ang kalihokan gipangulohan ni Research Division OIC Chief Grace Len C. Dagala.
Sa iyang mensahe, gipasiugda ni Regional Technical Director Wilberto O. Castillo ang kamahinungdanon sa hiniusang paningkamot sa DA-7 ubos sa pagpanguna ni Regional Executive Director Angel C. Enriquez, kauban ang mga tigdukiduki, lokal nga panggamhanan, ug mga mag-uuma aron mapalambo ang produksyon ug industriya sa ubi sa rehiyon.
Matud ni Dir. Castillo, ang maong workshop nagsilbing plataporma aron mapalig-on ang mga estratehiya, mapalambo ang koordinasyon sa mga kaabag, ug mapadali ang pagpatuman sa mga programa nga maghatag og mas lig-on ug mas kompetitibong industriya sa ubi sa Central Visayas.
Ang workshop nagtumong sa paglig-on sa implementasyon sa Yamang Ubi Project, usa ka inisyatibo nga nagpunting sa pagpauswag sa produksyon, panukiduki, pagproseso, ug pagdumala sa value chain sa ubi.
Gipalawom usab sa mga partisipante ang ilang kahibalo sa mga teknolohiya ug estratehiya aron mapataas ang kalidad ug kadaghan sa ani, samtang nagmugna og dugang oportunidad sa panginabuhian alang sa mga mag-uuma.
Usa sa mga gipasiugda sa kalihokan mao ang nagkadakong potensyal sa ubi isip usa ka high-value crop nga adunay dako nga panginahanglan sa lokal ug internasyonal nga merkado.
Sa padayon nga pagsaka sa interes sa mga produktong adunay ubi, sama sa mga pagkaon ug ilimnon, nakita kini isip usa ka mahinungdanong oportunidad aron mapalapad ang merkado sa lokal nga produksyon ug mapalambo ang kita sa mga mag-uuma.
Gihisgutan usab sa workshop ang mga estratehiya sa pagpalig-on sa supply chain, pagpalambo sa koordinasyon tali sa mga ahensya sa gobyerno ug pribadong sektor, ug paghatag og padayon nga suporta pinaagi sa panukiduki, modernong teknolohiya, ug capacity-building initiatives.
Pinaagi sa maong kalihokan, gipakita sa DA-7 ang padayon nga pagpalig-on sa industriya sa ubi isip usa sa mga prayoridad nga high-value crops sa rehiyon. Gilauman nga pinaagi sa lig-on nga panaghiusa sa gobyerno, pribadong sektor, ug mga mag-uuma, mas mapauswag ang produksyon sa ubi, mapalapad ang merkado niini, ug madugangan ang kita sa mga mag-uuma sa Central Visayas.