Usa ka dakong kalampusan alang sa Department of Agriculture – Central Visayas (DA-7) ang pag-ilang kang Christine A. Torlao sa 2026 National Scientist – Romulo G. Davide Excellence in Extension and Community Development Award sa Philippine Phytopathological Society (PPS).
Si Torlao, usa ka proud nga miyembro sa Philippine Phytopathological Society ug kawani sa Integrated Laboratory Division–Regional Crop Protection Center (ILD-RCPC) sa DA-7, nakadaog sa maong prestihiyosong award isip pag-ila sa iyang padayon ug dedikadong serbisyo sa extension ug community development, ilabina sa pagtabang ug pagpauswag sa kahimtang sa mga mag-uuma.
Nagsugod ang iyang community work sa DA-7 niadtong 2012, diin iyang gipangulohan ang produksyon sa microbial biological control agents ug pagbansay sa mga mag-uuma bahin sa pest management.
Pinaagi sa iyang kanunay nga pagtrabaho sa field, mas nasabtan ni Torlao ang tinuod nga mga hagit nga giatubang sa mga mag-uuma. Alang kaniya, ang extension work usa ka oportunidad nga madugtong ang siyensya ug teknolohiya sa aktuwal nga panginahanglan sa mga mag-uuma.
Sa iyang pagdawat sa maong award, nagpahayag si Torlao sa iyang dakong pagpasalamat sa 2026 PPS Awards Committee ug mga opisyal sa PPS, ingon man sa iyang mga kauban sa trabaho ug pamilya nga kanunay niyang kauban sa iyang sa serbisyo.
Gipahinungod usab niya ang maong kalampusan ngadto sa iyang mga mentor nga sila RCPC Chief, Dr. Jun Acabal ug Regional Technical Director for Research and Regulations Dr. Wilbert Castillo, ug kang DA-7 Regional Executive Director Angel Enriquez, nga mitampo sa iyang paglambo isip usa ka propesyonal ug extension worker.
Alang kang Torlao, ang pasidungog usa ka pahinumdom nga ang matag serbisyo, gamay man o dako, adunay dakong epekto kung kini gihimo uban sa tinuod nga gugma ug dedikasyon alang sa komunidad.
Ang DA-7 mapasigarbuhon sa maong kalampusan ni Torlao, nga nagpakita sa kahinungdanon sa siyensya, extension, ug community engagement sa pagpauswag sa kinabuhi sa atong mga mag-uuma.
