Mi-courtesy call si Aldrin Baldonado, kawani sa buhatan ni Assistant Secretary James A. Layug, kang Regional Technical Director for Operations Engr. Cirilo N. Namoc aron ipresentar ang Poverty Reduction, Livelihood and Employment (PRLE) Cluster Framework ug mahatagan og kahayag ug giya ang Department of Agriculture–Central Visayas (DA-CV) kabahin niini.

Ang PRLE Cluster usa sa mga cluster ubos sa National Task Force to End Local Communist Armed Conflict (NTF-ELCAC) nga nagpalambo sa whole-of-nation ug whole-of-government approach aron matubag ang mga panginahanglan sa mga marginalized communities ug makatampo sa pagwagtang sa mga hinungdan sa insurgency. Ilalom niini, gitinguha ang pagmugna og lig-on ug malungtarong mga oportunidad sa panginabuhi, ekonomiya, ug kita alang sa mga komunidad nga giila sa NTF-ELCAC isip prayoridad nga mga lugar.

Gawas sa paghatag og mga oportunidad sa panginabuhian, ang PRLE Cluster usa usab ka pamaagi aron mas mapalawom ang presensya ug serbisyo sa gobyerno ngadto sa mga komunidad nga adunay limitadong pagkakab-ot sa mga programa ug proyekto sa gobyerno.

Ubos sa maong cluster, ang Department of Agriculture maoy nag-unang ahensya. Busa, ang maong courtesy call nagsilbi usab nga higayon aron mapasabot sa DA-CV ang mga responsibilidad ug papel niini sa pagpatuman sa mga programa ug kalihokan ilalom sa PRLE Cluster.

Mipasalig si Engr. Namoc sa hingpit nga kooperasyon sa DA-Central Visayas, ilabina sa pagpangulo sa koordinasyon uban sa ubang mga ahensya sa gobyerno nga nalambigit sa maong cluster. Matud niya, importante ang hiniusang paningkamot aron mapadali ang kalamboan sa rehiyon, labi na sa mga geographically isolated and disadvantaged areas (GIDAs) nga nagkinahanglan og mas lig-on nga suporta ug presensya sa gobyerno.

Gitambongan usab ang maong courtesy call sa mga kawani gikan sa nagkalain-laing dibisyon ug opisina sa DA-Central Visayas aron mapalawom ang ilang pagsabot sa mandato, katungdanan, ug mga prayoridad nga kalihokan ilalom sa PRLE Cluster.