Gipahigayon ang usa ka panagtigom ug presentasyon kabahin sa beripikasyon sa Integrated Farm Attribution for Risk and Resource Monitoring and Management (iFARM) ug Pest Surveillance System sa Daanbantayan, Cebu, diin naila nga usa ka corn-producing municipality.
Gipangulohan ni Department of Agriculture – Central Visayas (DA-7) Regional Technical Director for Research and Regulatory Division, Dr. Wilberto O. Castillo, ang maong kalihokan nga nagtumong sa pagpalalom sa pagsabot sa papel sa digital nga sistema sa pagmonitor sa produksiyon sa mais, pag-ila sa mga risgo, ug paghatag og tukmang impormasyon alang sa pagplano ug pagpatuman sa mga intervention.
Kabahin kini sa usa ka research project nga gipondohan sa DA–Bureau of Agricultural Research (DA-BAR) uban sa suporta sa DA-National Corn Program, nga adunay P3,824,500.00 nga budget. Ang Daanbantayan, Cebu mao ang project site.
Pinaagi sa iFARM System, mahimong makuha ang mas tukma, updated, ug farm-specific nga datos gikan mismo sa tagsa-tagsa ka umahan. Lakip niini ang impormasyon kabahin sa kadak-on sa crop area, iskedyul sa pagtanom, paggamit sa agricultural inputs, lebel sa produksiyon, ingon man ang kadaot ug pagkawala sa ani tungod sa mga peste, sakit ug natural nga kalamidad.
Gipresentar usab ni Michelle E. Merin, Project Leader sa maong panukiduki, ang mga tumong, proseso, workflow, ug mga aplikasyon sa iFARM ug Corn Pest Surveillance System.
Lakip sa gipasabot mao ang digital data collection, regular ug seasonal updating, pest and disease monitoring, pre-disaster assessment, ug paggamit sa datos isip suporta sa mas epektibong pagdesisyon ug pagplano.
Importante usab ang Corn Pest Surveillance System sa paghatag og updated nga impormasyon kabahin sa mga peste ug sakit sa mais ug pagpalig-on sa early warning system aron mas paspas nga mahibal-an ug matubag ang mga hulga sa produksiyon.
Sa kinatibuk-an, gipakita sa maong kalihokan ang kamahinungdanon sa husto, updated, ug farm-specific nga datos aron mas mapaayo ang pagplano, pagmonitor, pagdumala sa risgo, ug paghatag og serbisyo ngadto sa mga mag-uuma.
Gilauman nga pinaagi sa iFARM ug Pest Surveillance Systems, mas mapalig-on ang digital nga pagmonitor sa mga umahan, early warning mechanisms, ug pest management interventions, nga makatampo sa mas lig-on ug produktibong industriya sa mais sa Rehiyon 7.
