Karong adlawa, Agusto 07, 2026, nakighimamat si Boljoon Mayor Joie Genesse N. Derama kang Department of Agriculture – Central Visayas (DA-7) Regional Executive Director Angel C. Enriquez aron hisgutan ang mga programa nga dugang makatabang sa atong mga mag-uuma ug mangingisda.

Gipakita ni Director Enriquez ang iyang bug-os nga suporta pinaagi sa pagpaila sa mga nagkalain-laing programa sa DA-7 nga mahimong mapahimuslan sa lungsod, kauban si DA7 Agribusiness and Marketing Assistance Division (AMAD) Chief Aurea Madrio. Usa sa mga nag-unang gihisgutan mao ang mga kinahanglanon ug rekisitos sa FEEDIS o Farmers and Fisherfolk Enterprise Development Information System, ingon man ang mga pamaagi aron mabalik ang kalamboan ug kasadya sa lokal nga sektor sa pangingisda.

Matud pa ni Mayor Derama, “Maayo ang programa ug produkto gikan sa SAAD,” ang SAAD o Special Area for Agricultural Development, usa sa mga programa ubos sa Department of Agriculture nga ang tumong mao ang pag hatag og libreng suporta sa pag-uma — sama sa mga liso, hayop, ug gamit—apil na ang pagbansay aron makasugod sila og kaugalingong agribusiness ug masiguro ang pagkaon sa ilang dapit. Naghinaot ang alkalde nga matabangan pa ang mag mag-uuma sa Boljoon pinaagi sa mga programa ubos sa DA.

Pinaagi niini nga kolaborasyon sa lokal nga pang gamhanan ug sa DA7, gipaniguro ni Mayor Derama nga buhaton ang tanan aron mapausbaw ang kita sa atong mga lokal nga mag-uuma ug mangingisda. Ang tanang pangingkamot gihimo alang sa padayong pag-uswag sa agrikultura sa munisipalidad sa Boljoon.