Gisusi sa Department of Agriculture–Central Visayas (DA7) ang nagkalainlaing merkado sa mga probinsiya sa Cebu ug Bohol aron masiguro ang hustong pagpatuman sa Executive Order No. 118 nga nagtakda og ₱50 kada kilo nga price cap sa 5% broken imported rice.

Mismo ang mga direktor sa ahensya ang nanguna sa monitoring sa mga merkado. Sa Sugbo, gilibot ni Regional Executive Director Angel C. Enriquez ang Carbon Public Market, Taboan Public Market, ug Tabunok Public Market diin iyang nasuta ang pagsunod sa mga retailer sa maong direktiba. Matud pa ni Director Enriquez, base sa iyang pakighinabi sa mga tindero sa bugas, nakita ang pagkunhod sa presyo sa bugas sukad sa implementasyon sa price cap.

Sa Tabunok Public Market, gipasabot ni Market Inspector Eugene Torres nga sukad sa pagpatuman sa EO 118 niadtong Mayo 13, 2026, gisugdan dayon nila ang pagpahibalo sa mga retailers ug pag-organisar og monitoring team aron masiguro ang pagsunod sa gitakdang presyo.

Samtang sa Mandaue Public Market, gipangunahan ni Regional Technical Director for Research and Regulations Dr. Wilberto O. Castillo ang monitoring ug nakita usab nila ang pagsunod sa mga retailer sa maong polisiya.

Sa Lapu-Lapu City Public Market, si Regional Technical Director for Operations Engr. Cirilo N. Namoc ang nangulo sa inspeksyon diin nakipag-estorya sila kang Jun Sismondo, usa ka rice retailer nga mituman dayon sa mandato sa EO 118.

“Mahitungod sa price cap, amo na kining gi-implement sukad pagduso sa EO 118. Gipahibalo pud mi sa among supplier; ang amo na lang kulang mao ang labelling kay okay naman mis presyo,” matud ni Sismondo. Dugang pa niya, nakahatag kini og benepisyo sa ilang mga mamalitay pinaagi sa mas barato nga bugas.

Sa Bohol, nasuta usab sa inspeksyon sa Dao Public Market sa Tagbilaran City nga ang tanang 16 ka establisyemento nga ginspeksyon mituman sa gitakdang ₱50 kada kilo nga price cap alang sa 5% broken imported rice, lakip ang mga brand sama sa Queen Bee ug Golden Honey.

Usa sa mga nakabenepisyo sa maong programa mao si Maria Jocelyn Carajay, usa ka tag-iya og karenderya sa Tagbilaran City, nga nakapalit og imported rice sa presyong ₱48 kada kilo. Matud niya, dako kini og tabang sa pagpadagan sa iyang gamay’ng negosyo.

Ang maong mga inspeksyon gipangunahan sa mga direktor sa DA-Central Visayas uban kang Agribusiness and Marketing Assistance Division (AMAD) Chief Aurea Madrio ug mga kawani sa maong dibisyon, mga kawani sa Bureau of Plant Industry (BPI) sa pagpanguna ni Eduardo Bahinting, ug sa Bohol team nga gilangkuban nila Agricultural Program Coordinating Officer Roman Dabalos, Assistant APCO Lavinia Corpus, ug mga kawani sa AMAD nga nadestino sa probinsiya.