Mas napalapdan na ang akses sa barato ug dekalidad nga bugas alang sa mga komunidad sa kabukiran human gilunsad sa Department of Agriculture–Central Visayas (DA-7) ang unang Kadiwa Store nga namaligya og P20 nga bugas sa Barangay Adlaon, Cebu City, karong adlawa, Hulyo 16, 2026.
Ang maong inisyatiba gipatuman pinaagi sa DA-7 Agribusiness and Marketing Assistance Division (AMAD) sa pakigtambayayong sa COBCAWA Multipurpose Cooperative ug sa Food Terminal Incorporated (FTI), isip kabahin sa padayon nga paningkamot sa gobyerno nga mapaduol ang abot-kayang bugas ngadto sa mga benepisyaryo bisan sa mga hilit nga lugar.
Matud pa ni DA-7 Regional Executive Director Angel C. Enriquez, “Nalipay gyud ko makakita ninyo. Dako kaayo namong garbo nga kamo ang pinakauna nga Kadiwa Store ngari sa bukid. Nagpakita ni nga kami sa gobyerno maninguha para sa atong mga tawo, ang mga pilipino.”
Mitambong usab sa maong kalihokan si Adlaon Barangay Captain Gemma Arcayan aron ipakita ang suporta sa lokal nga panggamhanan, kauban si Vince Marco D. Combate, representante sa FTI.
Ang mga mahimong mopalit sa baratong bugas naglangkob sa mga bulnerableng sektor ug grupo nga naglakip sa mga senior citizen, persons with disabilities (PWD), mga benepisyaryo sa Pantawid Pamilyang Pilipino Program (4Ps), mga solo parents, ug mga drayber sa habal-habal ug traysikol.
Sumala sa DA-7, ang pag-abli sa unang Kadiwa Store sa kabukiran nagpamatuod sa padayon nga pagpalapad sa programa aron mas daghang komunidad, ilabina ang mga anaa sa hilit nga kabukiran, makabenepisyo sa barato ug dekalidad nga bugas.
Gipakita sa maong inisyatiba ang nagpadayong paninguha sa atong gobyerno aron makab-ot sa ordinaryong pilipino ang seguridad sa pagkaon apil na ang dekalidad ug barato nga bugas.
