Aron mapalambo pa ang kahanas sa pagdumala sa kooperatiba ug makakuha og mga epektibong pamaagi nga mahimo nilang ipatuman, mibisita ang Negros Oriental Department of Agriculture Employees Multi-Purpose Cooperative (NODAEMPC) sa Department of Agriculture-Central Visayas (DA7) alang sa usa ka benchmarking o knowledge exchange uban sa Department of Agriculture Employees Multipurpose Cooperative (DAEMCO).

Gisugdan ang kalihokan pinaagi sa usa ka courtesy call kang Regional Executive Director Angel C. Enriquez. Gipadayag ni Dir. Enriquez ang iyang dakong kalipay sa pagkakita pag-usab sa mga kawani sa DA sa Negros Oriental nga karon sakop na sa Negros Island Region (NIR), ilabi na kay kaniadto kabahin pa sila sa DA7 sa wala pa matukod ang maong rehiyon. Gipasalig usab niya ang iyang hingpit nga suporta sa NODAEMPC ug sa ilang mga inisyatiba aron mapalig-on pa ang kooperatiba.

Human niini, gipadayon ang benchmarking pinaagi sa usa ka knowledge exchange uban sa mga opisyal sa DAEMCO nga gipangulohan ni Dr. Meqluiades B. Ibarra, Chairman sa Board of Directors. Atol sa maong sesyon, gipaambit sa DAEMCO ang ilang mga best practices sa pagdumala sa kooperatiba, lakip ang governance, financial management, ug operational management, aron mahimong giya sa NODAEMPC sa pagpalambo sa ilang mga serbisyo ug operasyon.