Gisugdan na sa Department of Agriculture (DA) ang mga pagpangandam alang sa 19th Philippine National Corn Congress – Visayas Cluster pinaagi sa pagpahigayon og Coordination Meeting karong adlawa, Hulyo 16, 2026 sa Cebu City, aron mapalig-on ang koordinasyon sa tanang rehiyon ug mga kaabag alang sa hapsay ug malampusong pagpahigayon sa nasudnong kalihokan sa Agusto.

Sa iyang mensahe, nagpahayag og dakong kalipay si Regional Executive Director Angel C. Enriquez nga gisaligan ang rehiyon syete mahimog host karong tuiga, pamatuod nga adunay pagsalig ang kaulohan sa kapasidad sa DA-7 sa pagdumala sa dagkong nasudnong kalihokan pinaagi sa epektibong koordinasyon, organisasyon, ug paghatag og dekalidad nga serbisyo sa mga mag-uuma ug mga kaabag sa sektor sa agrikultura.

“Ako mong gihangyo nga tabangi mi pagpasabot didto sa Amihanang bahin sa Sugbo nga adunay potensyal i-convert ngadto sa maisan ang mga plantasyon sa tubo didto nga nabiyaan human madaot sa nangaging bagyo ilang mga ikipo, isip usa sa mga alternatibong panginabuhian alang sa mga mag-uuma ug aron mapadayon ang produktibong paggamit sa umahan”, dugang ni Dir. Enriquez.

Samtang, gipasiugda ni National Corn Program Director Abel Wagas ang panultihon nga “Pag Corn Farmer, Walang Gutom,” nga nagpakita sa dakong papel sa industriya sa mais sa pagsiguro sa suplay sa pagkaon ug pagpalambo sa panginabuhian sa mga mag-uuma.

Gipasabot ni DA-7 Regional Corn Coordinator Engr. Roy Manzano ang mga tumong ug gilauman nga resulta sa maong tigom, lakip ang pag-finalize sa programa, venue, logistical arrangements, ug uban pang preparasyon aron masiguro ang hapsay nga dagan sa National Corn Congress.

Human sa tigom, nagpahigayon usab ang grupo og venue ocular inspection aron masusi ang kahimtang sa lugar ug mahan-ay pa ang mga plano alang sa umaabot nga congress.

Ang miting gitambongan sa mga Regional Corn Coordinators gikan sa Regions 6, 7, 8 ug Negros Island Region (NIR), mga kawani sa National Corn Program, ug mga opisyal ug Board of Directors sa Philippine Maize Federation, Inc. (PhilMaize), usa ka nasudnong organisasyon nga nagrepresentar ug nagpalambo sa interes sa industriya sa mais sa Pilipinas. Lakip sa mitambong si PhilMaize President Romualdo J. Elvira Jr. ug Vice President Dr. Artemio Salazar.

Gawas sa mga kawani sa DA7 corn program, mitambong usab si Cebu Provincial Corn Coordinator Marya Zea A. Villaganas ug si OIC-Agricultural Program Coordinating Officer (APCO) Noli N. Rasonabe.

Ang National Corn Congress 2026 ipahigayon sa Agosto 11-14, 2026. Ang mga rehiyon sa Central Visayas , Region 8, Region 9, ug NIR maoy magdala sa mga partisipanteng mag-uuma, samtang ang ubang mga rehiyon sa nasud representahan sa ilang mga Regional Corn Coordinators.

Ang maong kongreso gilauman nga mahimong higayon sa pagpaambit sa teknolohiya, kabag-ohan, ug mga estratehiya aron mapalig-on pa ang industriya sa mais sa nasud.