Nagsugod na ang pagpalig-on sa industriya sa animal feed o lawog sa rehiyon 7 pinaagi sa benchmarking activities nga gipahigayon sa Bureau of Animal Industry (BAI) sa mga probinsiya sa Cebu ug Bohol niadtong Hulyo 27 hangtud 31, 2026.

Kabahin kini sa National Animal Feed Development Program (NAFDP) sa BAI, nga gipahigayon pinaagi sa pakigtambayayong sa Department of Agriculture – Central Visayas ubos sa Regional Feed Chemical Analysis Laboratory (DA-RFCAL7).

Tumong sa NAFDP nga mapalig-on ang lokal nga industriya sa animal feed pinaagi sa pagdasig sa paggamit sa lokal nga mga sagol ug materyales sa paghimo og dekalidad ug angay nga lawog alang sa mga hayop.

Isip kabahin sa benchmarking, nakig-alayon ug nakighinabi ang mga representante sa BAI ug DA-RFCAL7 sa nagkadaiyang Local Government Units (LGUs), feed millers, akademya, ug uban pang mga stakeholder sa Cebu ug Bohol. Pinaagi niini, makuha ang mas tukmang datos sa kasamtangang kahimtang sa industriya, lakip ang mga hagit, oportunidad, ug panginahanglan sa sektor.

Giumol ang NAFDP pinaagi sa DA Administrative Order No. 04, Series of 2023, aron magsilbing giya sa paghimo sa usa ka komprehensibong National Animal Feed and Nutrition Industry Roadmap.

Ang mga impormasyon ug datos nga natipon gikan sa benchmarking activities magsilbing pundasyon sa paghimo og mas epektibong polisiya, programa, ug suporta alang sa padayong pagpalambo sa animal feed industry sa Rehiyon 7 ug sa tibuok nasud.