Sa iyang mensahe, gipasabot ni Agribusiness and Marketing Assistance Division (AMAD) Chief Aurea M. Madrio nga ang KADIWA usa sa mga plataporma sa DA aron direktang maabot sa merkado ang mga produkto sa mga mag-uuma. Matud pa niya, sukad sa pagsugod sa panagtambayayong tali sa DA ug Robinsons Galleria niadtong 2019, nagpadayon ang suporta sa mga farmers ug MSMEs bisan pa sa mga hagit nga ilang nasinati.

Ang relaunching nagtimaan usab sa usa ka dakong kalampusan alang sa mga partner farmers. Gikan sa libreng accommodation nga gihatag sa Robinsons Galleria sa unang mga tuig sa operasyon, ang mga exhibitors karon opisyal nang mga tenants pinaagi sa quarterly lease contract ug adunay kaugalingong mga display carts, nga nagpakita sa ilang pagtubo isip mga agripreneurs.

Nagpasalamat usab si Department of Agriculture Regional Executive Director Angel C. Enriquez sa Robinsons Galleria tungod sa padayon nga suporta niini sa mga mag-uuma sukad pa sa panahon sa pandemya hangtud karon.

Gipasiugda usab ni Dir. Enriquez ang kamahinungdanon sa Good Agricultural Practices (GAP) aron masiguro nga luwas, presko, ug dekalidad ang mga pagkaon nga maabot sa mga konsumidor. Iyang gihagit ang publiko nga suportahan ang lokal nga agrikultura pinaagi sa pagpalit sa mga produkto sa KADIWA ug pinaagi sa pagtanom sa ilang kaugalingong pagkaon.

Gipahinumdom usab niya ang programa nga “Tugkaran Mo, Tamnan Mo,” nga nag-awhag sa mga pamilya nga magtanom bisan sa gagmay’ng luna sa yuta sa syudad o sa kabaryohan. Matud pa niya, ang pagtanom dili lamang makatabang sa pagsiguro sa pagkaon sa pamilya kondili mahimo usab nga tinubdan sa dugang kita ug mahimong sinugdanan sa pagkamahimong agripreneur.

Human sa mga mensahe, gipangunahan ni Dir. Enriquez ug sa mga partner stakeholders ang ceremonial ribbon-cutting isip opisyal nga pag-abli sa gi-relaunch nga KADIWA Store.

Atol usab sa kalihokan, gihatagan og Certificate of Appreciation ang Robinsons Galleria Cebu ug ang DA7-AMAD isip pag-ila sa ilang panagtambayayong sa pagpalambo sa merkado alang sa mga lokal nga mag-uuma.

Sa pagkakaron, ang KADIWA Store adunay upat ka fresh tenants ug lima ka processed product tenants nga nagbaligya og nagkadaiyang presko ug dekalidad nga produktong agrikultural. Gawas sa kalidad, usa sa mga bentaha sa KADIWA mao ang paghatag og mas barato ug mas abot-kayang presyo sa mga konsumidor tungod kay direkta kini gikan sa mga mag-uuma ug processors.

Ang Cebu Go Get Fresh and Processed KADIWA Store nahimutang sa Basement Floor sa Robinsons Galleria Cebu ug bukas matag adlaw gikan alas 10 sa buntag hangtud alas 9 sa gabii.