Matud ni DA7 Regional Technical Director for Research and Regulations Wilberto O. Castillo, gikinahanglan nga adunay assessment matag tuig aron masuta kun unsay ang mga kalampusan ug kakulangan sa programa.
“Kinahanglan atong balikan ug tan-awon ang atong mga gihimo, unsa’y natampo sa AMAD sa tibuok ahensya labi na sa food security,” matud pa ni Castillo sa iyang mensahe.
Gipa-ambit niya ang papel sa teknolohiyang digitalization sama sa Artificial Intelligence (AI) nga sa pagkakaron paspas na kaayo ang kalamboan. “Kung ang uma mogamit sa digital agriculture, mas dali nato makuha ug masabtan ang datos,” dugang pa niya.
Gipasabot usab ni AMAD Chief Aurea “Jake” Madrio nga importante ang panaghiusa sa tanang section sa opisina. “Bisan dili ikaw naka-assign sa usa ka buluhaton, kung adunay kahibalo ug kadasig, dali ra ang trabaho ug dako ang matabang sa katawhan,” iyang padasig.
Sa diskusyon ni Dr. Gerry S. Avila, hepe sa DA7 Operations Division, iyang giila ang AMAD isip marketing arm sa DA. “Magsugod gyud ta sa plano. Asa ibaligya ang produkto? Unsa ang gusto sa merkado? Mao nay trabaho sa AMAD, ipakita nato sa mag-uuma nga aduna silay direksyon,” matud niya. Giingon sab niya nga importante ang pakigkoordinar sa LGU ug pag-edukar sa mga benepisyaryo bahin sa tinuod nga kahulugan sa agribusiness.
