Gipangulohan ang maong kalihokan ni OIC, Executive Director sa NMIS, Dr. Roberto S. Umali ug ni NMIS 7 Regional Technical Director, Dr. Alvin A. Leal, uban nga kawani sa NMIS, ug mga pribadong stakeholders.
Ginganlan ang pasilidad nga Dr. Romeo S. Capa Hall isip pag-ila sa dakong kontribusyon nga napa-ambit ni Dr. Capa, ang kanhi director sa NMIS 7. Usa niini ang Meat Inspection Code of the Philippines.
Gidawat sa pamilyang Capa ang certificate of appreciation ug dako ilang pasalamat sa NMIS sa pag-ila sa kontribusyon ni Dir. Capa.
Sa mensahe ni Dr. Umali, iyang gibalikan ang mga kaagi nila ni Dr. Capa. Iyang gisaysay nga pinaagi sa maong pasilidad, mahinumduman kanunay ang legasiya ni Dr. Capa.
Dugang sa iyang mensahe, gipahinumduman niya ang mga nigraduwar nga dili magpahaylo sa kwarta kundi unahon gyud ang pagserbisiyo sa nasud.
Sa laing bahin, si Dr. Leal nipadayag sa pag-ila sa dedikasyon sa mga bag-ong meat inspector, diin iya usab gipahinumduman ang mga nigraduwar sa ilang responsibilidad isip kaabag sa seguridad sa pagkaon, tigpanalipod alang sa luwas nga pagkaon para sa komunidad.
Baynte (20) ka mga indibiduwal sa nagkalain-laing lokal nga kagamhanan, lungsod og siyudad sa Rehiyon 7 mitapos sa 26 ka adlaw nga pagbansay-bansay sa BMIC nga gitudlo sa pagtamabayayong sa Agriculture Training Institute Central Visayas (ATI-7) ug NMIS 7.
Sa ngalan ni Regional Executive Director Angel C. Enriquez, si Admin and Finance Chief Melquiades Ibarra nihatag og mensahe nga makapadasig sa mga bag-ong nigraduwar nga padayun sa ilang tahas, kay sila ang saligan sa nasud sa pagsiguro sa luwas ug sustansiyado nga pagkaon sa matag Pilipino.
