Gipalig-on sa Department of Agriculture – Central Visayas (DA-7) ang koordinasyon ug pagtinabangay sa mga local government units (LGUs) ug mga kaabag sa livestock sector pinaagi sa Semestral Consultative Meeting sa mga Livestock Technicians ug Meat Inspectors sa Probinsya sa Sugbo, nga gipahigayon karong adlawa hangtud ugma, Hulyo 16–17, 2026 sa Cebu City.

Ang maong kalihokan nagtumong sa paghatag og pinakabag-ong impormasyon sa mga programa sa Livestock Program alang sa 2026, paglatid sa mga kalihokan alang sa nahibiling mga bulan sa tuig, ug pagpalig-on sa koordinasyon tali sa DA- 7, mga livestock technicians, meat inspectors, ug ubang stakeholders aron mas mapalambo ang implementasyon sa mga programa sa sektor sa kahayupan.

Si DA-7 Regional Executive Director Angel C. Enriquez, mipasalig nga mas gihingusgan sa ahensya ang pagbatok sa African Swine Fever (ASF) ug nanawagan og pakighiusa tali sa mga mag-uuma aron mapabiling ASF – free ang rehiyon.

“We were able to organize a meeting with all the provincial veterinarians in Bohol and Cebu. That unified effort proves that we can improve our biosecurity. We survived ASF in 2023. There’s no question we won’t survive ASF this year”, sumala ni Director Enriquez.

Atol sa tigom, gipresentar sa mga kawani sa DA-7 Livestock Program, sa pagpangulo ni Regional Livestock Program Coordinator Dr. Zeam Voltaire E. Amper, ang mga prayoridad nga programa sa National Livestock Program alang sa 2026, lakip ang Unified Artificial Insemination Program, Calendar of Activities, ug Livestock Economic Enterprise Development (LEED) Project.

Gihisgutan usab ang Protocol on Upgrading of ASF Zones isip kabahin sa padayon nga paningkamot sa pagpalig-on sa biosecurity ug pagbatok sa African Swine Fever (ASF).

Gidapit usab ang mga stakeholders aron mahibalo sa mga update kabahin sa husto ug tukmang pagsumiti sa mga report, ingon man sa mga proseso sa pag-isyu sa lisensya alang sa mga pribadong livestock farms, livestock handlers, ug livestock transport carriers.

Sa ikaduhang adlaw, ipahigayon ang bukas nga konsultasyon aron mapaminaw ang mga isyu, kabalaka, ug mga hagit nga giatubang sa mga livestock technician ug meat inspectors sa implementasyon sa mga programa sa ilang tagsa-tagsa ka lokalidad.

Pinaagi sa maong tigom, gipalig-on sa DA-7 ang koordinasyon uban sa mga LGUs ug pribadong stakeholders aron masiguro ang epektibong implementasyon sa mga programa sa livestock, hapsay nga pag-report, ug lig-on nga sistema sa meat inspection alang sa luwas ug dekalidad nga karne nga maabot sa mga konsumidor sa Sugbo.