Malampusong gipahigayon ang Panagtagbo ug Strategic Planning sa lungsod sa Sagbayan, Bohol, isip kabahin sa pagpalig-on sa koordinasyon tali sa Department of Agriculture – Central Visayas (DA-7) ug sa Local nga Panggamhanan sa Sagbayan alang sa hapsay nga pagpatuman sa RSBSA Georeferencing Activity sa lungsod.

Mitambong sa kalihokan si Municipal Mayor Asuncion “Siony” Ybanez, Municipal Agriculturist Arlen Aparri ug mga kawani sa Municipal Agriculture Office, mga opisyal sa barangay, mga miyembro sa Irrigators’ Association ug Farmers’ Association, ingon man ang DA – Bohol Agricultural Program Coordinating Office (APCO) nga gipangulohan ni Roman Dabalos.

Gipangulohan ni Municipal Agriculturist Arlen Aparri ang pag-abli sa kalihokan ug pag-abiabi sa mga partisipante, samtang si Mayor Ybanez mipasiugda sa kamahinungdanon sa RSBSA Georeferencing Activity sa pagpaayo sa mga rekord sa agrikultura ug giawhag ang mga opisyal sa barangay, farmers’ organizations, ug irrigators’ associations nga aktibong mokooperar aron masiguro ang kalampusan sa implementasyon.

Gipasabot usab ni Bohol APCO Roman Dabalos ang mga tumong sa RSBSA Georeferencing Activity, ilabina ang pagbaton og eksakto, updated, ug kasaligan nga impormasyon sa mga farm parcel. Importante kini alang sa mas maayong agricultural planning, policy-making, ug tukmang paghatod sa mga programa, serbisyo, ug intervention sa gobyerno ngadto sa mga mag-uuma.

Sa presentasyon ni RSBSA Staff Representative Jeralen Cuajao, gipakita ang kinatibuk-ang nadeklarar nga luna sa mga agricultural commodities sa Sagbayan ug gitandi kini sa kinatibuk-ang measured area base sa 2023 georeferencing data. Gihisgutan usab ang nahibiling agricultural areas nga kinahanglan pang masukod ug ma-validate atol sa umaabot nga implementasyon.

Samtang, gipresentar ni RSBSA Team 2 Leader Daryl James Tura ang proposed schedule sa mga barangay nga unahon sa georeferencing. Iyang gipatin-aw ang implementation plan ug pagkasunod-sunod sa field activities aron maandam ang mga barangay alang sa umaabot nga operasyon.

Gisundan kini sa open forum diin gitubag ni RSBSA Georeferencer Team Leader Efren Meyor ang mga pangutana, kabalaka, ug klaripikasyon sa mga partisipante kabahin sa georeferencing process, responsibilidad sa matag stakeholder, ug kamahinungdanon sa koordinasyon tali sa LGU, barangay officials, ug mga mag-uuma.

Sa pagtapos sa kalihokan, mipadayag ang mga partisipante sa ilang suporta ug pasalig nga mo-kooperar alang sa epektibong pagpatuman sa RSBSA Georeferencing Activity sa Sagbayan.

 

Ang maong kalihokan nahimong importante nga lakang sa pagpalig-on sa partnership tali sa Department of Agriculture ug LGU Sagbayan ug sa pag-angkon og mas tukma, updated, ug kasaligan nga agricultural data—nga mahimong pundasyon sa mas hapsay nga pagplano ug paghatod sa mga programa ug serbisyo alang sa mga mag-uuma sa lungsod.