Aron mapalig-on ang kapasidad sa mga field implementers sa pag-giya sa mga asosasyon sa mag-uuma ngadto sa malungtaron ug market-oriented nga mga negosyo, gipahigayon sa Department of Agriculture – Special Area for Agricultural Development (DA-SAAD) Program sa Central Visayas ang Training of Trainers on Market-Related Enterprise Development ning bag-uhay lang sa Cebu City.
Ang duha ka adlaw nga pagbansay nagtumong sa paghatag og praktikal nga kahibalo sa 25 ka kawani sa SAAD gikan sa probinsya sa Cebu ug Bohol aron mas epektibo nilang matudloan ang mga benepisyaryong mag-uuma sa pagbalhin gikan sa produksiyon lang ngadto sa pagtukod og mga patigayon nga nagtubag sa panginahanglan sa merkado ug sa mga konsumidor.
Si Paulo R. Uy, kinsa pangulo sa Cebu Provincial Investment and Promotions Division, pangulo sa Secretariat of the Economic Enterprise Council, ug Digitalization Lead sa Probinsya sa Sugbo, maoy nahimong resource speaker sa maong kalihokan. Gipasiugda niya ang kahinungdanon sa market development, customer engagement, enterprise positioning, ug pagpalig-on sa dugayng relasyon sa mga mamalitay isip pundasyon sa malampusong agribusiness.
Atol sa pagbansay, gihisgutan nga ang unang pangutana sa usa ka malampusong negosyo dili ang “Unsa ang atong ma-prodyus?” kondili “Unsa ang gikinahanglan sa kostumer?”. Gipatin-aw usab ni Uy ang kalainan sa usa ka producer ug usa ka entrepreneur, diin ang desisyon sa produksiyon kinahanglan nga mag-depende sa panginahanglan sa merkado.
Gipaila usab sa mga partisipante ang konsepto sa market segmentation ug customer profiling aron mas mailhan ang posibling mga mamalitay, masabtan ang ilang panginahanglan, pamatasan sa pagpamalit, ug mga hagit nga ilang giatubang. Pinaagi sa mga case study ug workshop, gipraktis nila ang pag-analisar sa feedback sa mga mamalitay ug pag-ila sa mga oportunidad sa merkado.
Usa sa mga mahinungdanong mensahe nga gipasiugda sa pagbansay mao ang “Never assume, ask,” nga nagdasig sa mga partisipante sa pagkuha og kasaligan nga impormasyon gikan sa mga mamalitay pinaagi sa obserbasyon, interbyu, ug regular nga ebalwasyon aron makahimo og husto nga mga desisyon sa negosyo.
Gihatagan usab og pagtagad ang epektibong komunikasyon ug pagpakig-engage sa mga mamalitay, diin gihisgutan nga ang pagsalig sa kustomer matukod pinaagi sa pagtuman sa mga saad, makanunayon nga komunikasyon, pagpaminaw sa feedback, ug padayon nga pagpaayo sa kalidad sa produkto ug serbisyo.
Sa sesyon bahin sa marketing ug business positioning, gipahinumdoman ang mga partisipante nga dili ang logo o presensya sa social media ang labing hinumduman sa mga kostumer, kondili ang maayong reputasyon sa usa ka negosyo. Busa, gidasig sila sa pagtabang sa mga asosasyon sa mag-uuma sa pagtukod og kasaligan ug dekalidad nga mga produkto ug serbisyo.
Aron mapalig-on ang ilang nakat-onan, naghimo ang mga partisipante og team strategy exercise gamit ang usa ka fictional farmers’ association nga SIFA, diin ilang gihimo ang customer-centered growth plans base sa market analysis. Gipakita sa maong ehersisyo ang importansya sa pagpalambo sa kalidad sa produkto, pagpalig-on sa relasyon sa mga kostumer, ug pagtukod og maayong reputasyon aron madugangan ang panginahanglan sa merkado.
Ang pagbansay kabahin sa padayon nga inisyatiba sa DA-SAAD aron maandam ang mga kawani sa Regional ug Provincial Program Management Support Offices (RPMSO ug PPMSO) isip trainers ug mentors nga motabang sa mga asosasyon sa mag-uuma sa pagpalambo sa lig-on, market-driven, ug customer-focused nga mga patigayon. Pinaagi niini, gitinguha sa programa nga mapalambo ang kompetensya sa mga mag-uuma, mapalapad ang ilang access sa merkado, ug mamugna ang mas malungtarong panginabuhian alang sa mga benepisyaryo sa SAAD sa tibuok Central Visayas.