Mapasalamaton ug madasigon nga gisaulog sa Department of Agriculture (DA) ang ilang ika-128 nga kasumaran sa pagkatukod dungan sa pagpahigayon sa Partners Pasasalamat niadtong Hulyo 3, 2026, didto sa prestihiyosong hotel sa Cebu City.
Kini nga tinuig nga panagtigom nagtumong sa pag-ila ug pagpasidungog sa mga kakugi, kontribusyon, ug dedikasyon sa mga mag-uuma, lokal nga kagamhanan (LGU), nasyonal nga ahensya, pribadong sektor, ug mga kauban sa media nga nanalipod ug nagpausbaw sa sektor sa agrikultura sa tibuok rehiyon.
Usa sa mga highlight sa kalihokan mao ang pasidungog sa mga Gawad Saka Winners kauban ilang mga technician, kinsa mga mag-uuma, mananagat, ug mga asosasyon nga adunay dakong kontribusyon sa kinatibuk-ang kalambuan sa sektor.
Giila isip Outstanding Young Farmers Organization ang Greenthumpreneurs Young Farmers’ Club uban sa ilang Assistant Technician nga si Jay Marc T. Sotto.
Gipasidunggan usab sila si Windyl E. Mejias isip Outstanding Agri-Extension Worker ug si Angelito A. Oroyan isip Outstanding Agri-Extension Manager.
Samtang si Gelyn I. Asares ang gikoronahan isip Outstanding Corn-Based Farmer kauban ang iyang Assisting Technician nga si Ana Marie Caitom.
Apil sa mga indibidwal nga mikuha og dakong pasidungog mao sila:
• Geoffrey G. Cepedoza – Outstanding High Value Crops-Veg. (Assisting Technician, Rimmel Torregosa)
• Rhodman Joseph Ubas – Outstanding Young Farmer
Edsel L. Pepito – Outstanding Coconut Farmer ( Assisting Technician, Oliver B. Valera)
• Sikatuna National Agricultural High School – Outstanding Urban and Peri Urban Macro-Garden
• San Nicolas Elementary School – Outstanding Urban and Peri-Urban Micro-Garden
• Aguipo Coconut Farmers Multipurpose Cooperative – Outstanding Coconut Farmers Organization (Assisting Technician, Jacquelin Babatuan)
• Geneveve M. Abella – Assisting Technician, Urban and Peri-Urban Micro-Garden
Matag regional winner nakadawat og plaque of recognition ug P100,000 nga cash prize alang sa mga indibidwal samtang P500,000 nga cash prize alang sa mga grupo nga kategorya.
Samtang ang ubang gipasidunggan nakadawat og plaque og recognition ug tokens nga adunay mga produktong pang-agrikultura sama sa black rice.
Una niini ang mga lokal nga kagamhanan nga nahimong kaabag sa ahensya. Labing gipasidunggan ang lokal nga pangaggamhanan sa Probinsya sa Sugbo ug Bohol isip pag-ila sa ilang walay puas nga pagsuporta sa mga programa sa DA ug sa mga inisyatiba nga makatabang sa mga konstituwente.
Giila usab ang mga LGU Tuburan (Cebu), LGU Lapu-Lapu City (Cebu), LGU Garcia Hernandez (Bohol), ug ang LGU San Miguel (Bohol) sa ilang mga programa ug proyekto nga dakong tampo sa kalambuan sa agrikultura.
Samtang ang TOP 2 SAAD Beneficiaries ganti napunta sa LGU Sevilla (Bohol) ug LGU Alcantara (Cebu).
Alang sa top 3 Municipal Agri-Fishery Development Plan (MAFDP), nakuha kini sa LGU Tuburan, LGU Ginatilan, ug LGU Sogod sa Sugbo samtang sa probinsya sa Bohol mao ang LGU Talibon, LGU Sevilla, ug LGU Catigbian.
Nagkalain-laing National Government Agencies (NGAs) sama sa DSWD-7, DepDEV-7, DOLE-7, DOST-7, DILG-7, PNP-7, BJMP-7, ug Food Terminal Inc. ang nakadawat sab og pag-ila tungod sa ilang walay puas nga suporta sa mga programa sa DA.
Gihatagan sab og Special Awards sila Joselito Albeos, Mega World–Mactan Newtown, Robinsons Galleria Cebu, Melanie Ng, Benedict Y. Que, ug mga educational institutions sama sa BISU-Bilar Campus, ug ang mga campus sa CTU sa Barili, Argao, ug Tuburan.
Sa laing bahin, gi-ila ang mga nagmantenir og kalidad sa industriya:
• Good Agricultural Practices (GAP): Peba Hydroponics, Inc., Lazy Crops Farm, Tuburan Coffee and Technical Marketing, ug Sera Garden Tech Corporation.
• Good Animal Husbandry Practices (GAHP): Asturias Farm, Inc. ug Marcela Farms, Inc.
Wala kalimti sa DA-7 ang dakong papel sa media sa pagpahibalo sa mga proyekto sa agrikultura. Garbo nga gidawat sa GMA Regional TV – Cebu, CCTN 47, DYAR 765 SMNI, Radyo Pilipinas Cebu, DYHP RMN Cebu, Bombo Radyo Cebu, DYRF Radio Fuerza, ug The Freeman ang ilang mga pasidungog.
Nadawat usab sa beteranong mamamahayag nga si Mitchelle Palaubsanon ang pasidungog isip outstanding partner-journalist.
Dakong kalipay ni DA7 Regional Executive Director Angel C. Enriquez nga nagtapok ang tanang stakeholders nga adunay dakong kontribusyon sa kalambuan sa sektor ilabi na ang mga mag-uuma.
“I may not be able to tell your stories one by one, but I know that your mere presence here is already an indication that you are one of us in the development of the agricultural sector,” dugang ni Dir. Enriquez.
Malipayong gipadayag ni Gawad Saka National Awardee ug kasamtangang regional awardee sa Urban and Peri-urban Micro-garden category, Jojo Ehem, ang coordinator sa Gulayan sa Paaralan sa San Nicolas Elementary School, nga dakong garbo sa ilang tunghaan og sa tibuok rehiyon ang ilang kadaugan.
”Akong giawhag ang tanan, nga atong tudluan ang atong mga kabataan ug silingan sa pagpananom, kay walay rason nga dili ta makatanom sa atong panimalay,” dugang niya.
Gibutyag pod niya nga samtang nagtudlo pa siya sa tunghaan, magpabilin niyang pahingusgan ang pag-uswag sa agrikultura pinaagi sa padayong pag-atiman sa Gulayan sa Paaralan aron makatabang sa mga estudyante ug mga senior citizens.
Dakong garbo pod sa LGU Tuburan diin nakadawat sila og tulo ka lain-laing awards.
Sigun ni Tuburan Municipal Agriculturist Kent Marcial Catubis, “This agricultural undertaking cannot be achieved alone; today, we share these accolades with our national and regional agency partners, especially the DA, who have consistently poured technical and financial support into our town, with our FCAs, and with our agricultural extension workers.”
Mipaabot pod sa suporta ang chairperson sa Economic Development Committee of the Regional Development Council (EDC-RDC), Melanie Ng, diin usa pod siya sa gipasidunggan sa iyang maayong paggiya ug pagdumala sa organisasyon.
“Let your stories be heard across the country, dapat mag-una gyud tang Central Visayas,” iyang awhag sa mga awardees samtang gipalig-on ang kanunay nga suporta sa EDC-RDC.
Kini nga selebrasyon nagsilbing lig-on nga timaan nga ang agrikultura sa rehiyon nagpabiling buhi ug madasigon tungod sa pagtinabangay sa gobyerno, pribadong sektor, ug mga tinuod nga bayani sa umahan—ang mga mag-uumang Pilipino.
Mapasalamaton ang DA7 sa padayong pakigbisog sa tanan aron walay mabiyaan ug aron dungan ang pag-uswag padulong sa kalambuan sa sektor sa agrikultura.