Sa pagsaulog sa Soil Conservation Month, 86 ka mga indibidwal sa lainlaing grupo o sektor sama sa Phillipine Army, 4H Club, Sangguniang Kabataan (SK), mga kawani sa lokal nga pangagamhanan sa Tuburan, Cebu gikan sa Municipal Disaster Risk and Reduction Management Office (MDRRMO) ug Municipal Agriculture Office (MAO), misalmot sa tree planting activity nga gihimo sa Matuwang, Kansi, Tuburan karong adlawa, Hunyo 25, 2025.
Ang kalihukan gipangulohan sa Department of Agriculture-Bureau of Soil and Water Management (DA-BSWM), kauban ang DA-Central Visayas (DA7) ug ang Local.Government Unit (LGU- MAO), diin si incoming Tuburan Mayor Engr. Christian Daniel Diamante maoy nangulo sa pagpananom sa saging ug guyabano, kauban ang mga mag-uuma sa Barangay Kansi Farmers Association (BAKAFA).
Tungod sa gi.establisar nga Sustainable Land Management (SLM) on Corn Based Sloping Areas nga proyekto sa DA-BSWM sa barangay Kansi, maong sa barangay mismo gihimo ang tree planting. Ang mga mag-uuma nga naapil sa SLM maoy nipili nga ang itanom mao ang saging ug guyabano.
“Ania kami karon sa pag-apil sa tree planting activity sa BSWM. Nakatanom kami og saging ug sabana (guyabano) ganeha, apan dili lang kana ang among nadawat, lakip na ang mga binhi sa mais ug mga abono nga among gitanom karon nga cropping. Mapasalamaton mi sa BSWM, DA Region 7 ug Tuburan MAO, og hilabi na sa atong Presidente BBM sa walay pu-as nilang pagsuporta kanamong mga mag-uuma. Unta magpadayon pa kaning mga tabang dire kanamo sa muabot pang mga katuigan.” mga pulong pasalamat ni Lilies Maru, usa ka miyembro sa BAKAFA.
Ang bulan sa Hunyo gideklarar pinaagi sa Department Order No. 2 s 1997 og sa Administrative Order 16, s.2007.
