Sa Organic Agriculture (OA) nga pagpanguma, daku kini nga tabang nga mahibalik ang nangaguba na nga kaumahan ug kinaiyahan, ingon man ang kahimsog sa panglawas ug kumunidad.

Kini ang gisaysay ni Ma. Cristy S. Deguma, usa ka magtutudlo ug miyembro sa Organic Agriculture Practitioners Association (OAPA) sa Naga, Cebu, nga nitambong sa Participatory Guarantee System (PGS) Traceability and Recordkeeping nga pagbansay, diin matud niya nga ang organikong pagpanguma daku og tabang kanilang mag-uuma ug sa kunsyumer kay dili kini makadaot sa kinaiyahan ingon man sa kalawasan, tungod kay wala kini nigamit og mga kemikals.

Nipa-ambit siya nga hugot ang iyang suporta sa OA, tungod sa kasaysayan sa iyang pamilya nga adunay sakit nga kanser maong isip depensa ug mapugngan ang sakit, nipraktis siya sa organic nga pamaagi sa pagpananum.

Si Ronilo Montejo nga taga-Tabogon ug miyembro sa COAC, mipa-ambit nga sauna ang konsepto o ang pagsabot sa mga tawo nga ang organic alang lang sa adunahan, apan tungod kay napasabot na pag-ayo, para kin isa tanang mag-uuma nga gusto mag-organic ug gustong mamaligya og limpyo ug kasaligan nga produkto.

Ang OAPA nga grupo, kauban ang Cebu Organic Agriculture Cooperative (COAC) gipaubos sa PGS Traceability and Recordkeeping, aron mahibaloan o masubay ang lihok sa mga produktong agrikutura kun traceability-gikan sa yuta, pag-ani, postharvest, ngadto sa pagbaligya, samtang ang recordkeepingmao ang husto nga dokumentasyon aron mapamatud-an nga organic gyud ang produkto.

Ang OAPA nga girepresentahan sa ilang mga core members nga aduna na’y sertipikado ang ilang produkto basi sa scope of production ug ni-apply na sila (OAPA) og accreditation isip usa ka PGS-OCB.

Ang core farmer members sa COAC, ni-apply pa sa ilang tagsa-tagsa ka ‘scope of product’ nga maoy ipa-certify.