“Sa gipa-ambit nga teknolohiya sa pagmangga, daghan mi nga nakat-onan.”
Kini ang tipik sa testimonya nga gipa-ambit ni Gerry Arcilla, usa ka mango farmer gikan sa Barangay Tagba-o, Cebu City.
Moabot sa saysenta ka mango growers gikan sa bukirang barangay sa dakbayan sa Sugbo (Cebu City) ang mitambong sa Farmers’ Training on Good Agricultural Practices (GAP), Integrated Pest Management (IPM), ug Insecticide Resistance Management (IRM) nga gihimo ang pagbansay didto sa Cebu City Resource Management and Development Center (CREMDEC) Taptap, Cebu City niadtong Hulyo 22-23, 2025.
Sa makadiyot nga kukabildo, nasayran ang mga kakulangon nga teknolohiya sa pagmanggahan.
Matud ni Arcilla, “naa mi kaalaman kabahin sa pag-atiman sa mangga. Apan mapasalamaton mi sa pag-invite namo karon aron mamahimong mas produktibo ang amoang mangghana. Nakat-on mi ining pamaagi nga grafting, ngadto sa pagharvest. Hinaut nga daghan pang mahatag nga hinabang namong mga mango farmers. Sinugdanan pa lang ni sa paghatag ug training, daghan pang tabang ang muabot.”
Si Engr. Erlyn N. Billones, nga taga-Bureau of Plant Industry-Guimaras (BPI-Guimaras) mipa-ambit nga kinahanglan mahibaloan sa mga magmanggahay nga importansya sa pagproduce og high quality mangoes, sama sa Guimaras nga nailhan sa ilang kalidad nga mangga.
Sa diskusyon, gitudlo ang nursery management, diin gipahimangnoan nga kun maghimo og nursery, kinahanglang nga ang liso nga gikoleta gikan sa hinog ug himsog nga bunga. Hugasan kini, pa-ughon, dayon itanom sa saktong yuta sa plastic bag (polyethylene) o tray, samtang ang soil sampling mao ang pagkuha og ginagmay nga yuta aron masuta sa kakulangon sa nutriheno ug kung angayan ba nga tamnan og mangga.
Sa hands-on demonstration, mga teknolohiya nga gitudlo mao pagkuha sa mga sanga nga dili kinahanglan (pruning), sakto nga pag-abono o ring fertilization sa mangga nga duha ka metros ang gilay-on gikan sa puno-an aron dili madaot ang gamot ug masipsip sa tanom ang abono.
