Mga provincial, city, ug municipal veterinarian ug municipal agriculturist, ingon man mga pribadong sektor nga namuhi og mga poultry sama sa manok, buntog, pato, bibe ug mga langgam dinhi sa rehiyon syete misalmot sa gipahigayon nga information caravan kabahin sa Avian Influenza (AI) o mas naila nga bird flu.
Ang AI usa ka sakit dala sa Influenza A virus nga makuha sa mga migratory bird.
Sa mensahe ni Department of Agriculture-Central Visayas (DA7) Regional Technical Director (RTD) for Research and Regulations Wilberto Castillo, mipadayag nga importante ang kining panagtapok kabahin sa AI, dili lang isip konsultation ug diskusyon, kun di ang paghibalo ug pag-awhag sa mga stakeholders aron ma-protektahan ang poultry industry ug mapadayon nga AI-free ang rehiyon.
“Dako og kontribusyon ang poultry sa sektor sa agrikultura dinhi sa Central Visayas, gane moabot kini sa 22.4% sa kinatibuk-an”, matud ni Castillo.
Gihatagan og gibug-aton sa Bureau of Animal Industry (BAI) ang pagpakatap og saktong biosecurity measures batok sa AI tungod kay ang maong sakit naghatag og hulga dili lang sa mga poultry nga binuhi, apil usab sa katawhan.
Nasayran nga sukad sa unang kaso sa AI sa nasud sa Pilipinas niadtong 2017, moabot na sa 954 ka tawo ang nataptan sa maong sakit ug 464 niini ang namatay. Samtang kapin duha ka milyon na ka manok ang namatay.
Giklaro sa BAI nga sa pagkakaron wala pay tambal ang AI. Adunay bakuna apan naa pa sa laing nasud.
Giawhag ang katawhan nga moduol sa pinakaduol nga opisina sa Department of Agriculture, Veterinary Offices o BAI ug itaho kon adunay namatikdan nga posibling kaso sa AI sa ilang mga binuhi nga manok, buntog, bibe, pato ug langgam.
