Aron hapsay ug paspas ang pagdeliver sa mga produkto sa agrikultura ug sa panagatan, mga ahensya sa gobyerno nga may kalambigitan sa Foodlane nga programa mitambong karong adlawa, Hulyo 24, 2025 sa oryentasyon nga gipasi-ugdahan sa Department of Agriculture-Central Office Agribusiness and Marketing Assistance Service (DA-AMAS).
Pinaagi sa DA7 Agribusiness and Marketing Assistance Service (DA7 AMAD), mga imbitado nga ahensya nga mitambong mao ang provincial veterinary office (PVO) sa Sugbo, Local Government Unit (LGU) sa Leyte, Lapu-Lapu, Liloan, Cebu City, Talisay ug Mandaue, mga city ug municipal agriculturists, nasudnong ahensya sa gobyerno sama sa Philippine National Police (PNP), Bureau of Fishereis and Aquatic Resources (BFAR) Maritime Industry Authority (MARINA), ug mga pribadong kompanya sama sa San Miguel Foods, Bounty Plus, ug Eggcelsior Farms.
Gipasabot ni Edmar Fajutagana, ang OIC-Chief Agriculturist sa DA-AMAS, nga ang Foodlane Project usa ka inisyatiba sa DA, kauban ang Department of Interior and Local Government (DILG), PNP ug Metro Manila Development Authority (MMDA) aron mas paspas ug walay babag ang pag-deliver sa agri-fishery products gikan sa production areas paingon sa merkado.
Tumong sa programa nga mokunhod ang gastos sa transportasyon, pagminus sa post-harvest losses ug mapadali ang delivery sa pagkaon. Sa datos, 62. porsyento ang pagkunhod sa gastos sa transportasyon samtang 58.3 porsyento ang pagkunhod sa post-harvest losses.
Matud ni Melquiades Ibarra, hepe sa Admin and Finance Division (AFD) sa DA, dako kaayo og tabang ang Foodlane ilabina sa Sugbo nga usa sa dakong trading center sa Kabisay-an. Gikinahanglan ang koordinasyon sa tanang ahensya aron mas dali madala ang pagkaon gikan sa production area paingon sa lamisa sa konsumidor.
Ang mga truck nga rehistrado sa Foodlane adunay sticker nga nagpakita sa logo sa DA, DILG, MMDA ug PNP, makatabang nga malikayan ang mga kotong ug makalusot bisan pa sa mga checkpoint. Apil sa sakop nga produkto mao ang humay, mais, prutas, gulay, karne, itlog, isda, feeds, fertilizers ug uban pang pagkaon nga dali madaot.
