Mga miyembro sa Calangahan Active Farmers Association sa Sagbayan, Bohol malipayong midawat sa proyektong Solar Powered Irrigation System (SPIS) gikan sa Department of Agriculture (DA) karong adlawa, Hulyo 31, 2025.
Si DA-Central Visayas (DA7) Regional Executive Director Angel C. Enriquez pormal nga mitunol sa ‘certificate of turn over’ ug ang yawe o ang ‘key of ownership and responsibility’ ngadto sa probinsya sa Bohol ug gitunol sab kini ngadto sa Local Government Unit (LGU) sa Sagbayan nga iya usab gitunol sa Barangay Kapitan sa Calangahan ug gitunol ngadto sa Presidente sa Calangahan Active Farmers Association.
Sa iyang kukabildo sa mga mag-uuma, si Director Enriquez mipasabot nga ang tumong sa maong proyekto nga motaas ang abot sa mag-uuma ingon man ang ilang kita.
Iyang gi-aghat ang mga mag-uuma nga mopa-ambit sa benepisyo nga ilang natagamtaman tungod sa SPIS pinaagi sa paghatag og report nga mosaysay sa dakong tabang sa ilang pagpanguma sa humayan.
Ang asosasyon mipasalamat sa DA ni Secretary Francisco “Kiko” Tiu-Laurel Jr. ug ni President Ferdinand Marcos, Jr. sa proyektong patubig, nga wala sila gihikawan sa ilang panginahanglan.
Matud ni Ferdinand Tocmo, Presidente sa maong asosasyon, nga nagsalig ra sila sa tubig-ulan aron makapugas og humay, apan karon nga duna na sila’y irigasyon makapugas na sila sa hustong panahon ug gani nitaas ilang ani.
