Midawat ang Sisters of Mary School Boystown Inc. sa Minglanilla, Cebu og usa ka greenhouse nga adunay hydroponics facility system nga nagkantidad og PHP 1.1 milyon, gikan sa Department of Agriculture – Regional Field Office 7 (DA-RFO 7), atol sa pormal nga turnover karong buntaga, Hulyo 22, 2025.
Ang pagtunol sa pasilidad, gipangulohan ni DA7 Regional Executive Director Angel C. Enriquez, kauban ang ubang kawani sa DA7 nga gidawat sa mga madre ug magtutudlo atol sa ribbon-cutting ceremony nga gihimo sulod sa ilang eskwelahan.
Sa mensahe ni Sister Eva Aringo, dako ang ilang pasalamat sa DA7 sa greenhouse nga ilang nadawat, diin makatabang kini sa paghatag og lab-as nga mga utanon nga makaon sa ilang mga estudyante. Gidayeg nila ang inisyatibo sa DA, ilabi na kang Director Enriquez, aron mapalambo ang agrikultura sa ilang eskwelahan.
Si Director Enriquez, sa iyang mensahe ni-awhag sa kabatan-onan nga pamalandungan ang pagpili og kurso o career nga may kalambigitan sa agrikultura. Gihatagan sab niya ang gibug-atan nga ampingan pag-ayo ang Greenhouse aron kini magamit pa sa umaabot nga mga henerasyon.
Ang mga estudyante misaksi sa pagtunol ug mihatag og presentasyon sama sa sayaw, pasalamat, ug tribute.
