Ang cacao susama na daw sa usa ka bulawan.
Mao kini ang gipa-ambit ni Russian Honorary Consul Armi Garcia, kinsa chairperson sa Cebu Cacao Industry Development Inc. (CCIDI), diin gisaulog sa Cebu ang 2025 World Chocolate Day nga gipahigayon sa Robinsons Galleria, Cebu City, karong adlawa, July 23, 2025.
Ikatulong tuig na kining pagsaulog sa World Chocolate Day, diin adunay tema nga, “Tsokolateng Pinoy: Chocolates for EveryJuan,” nga gitambongan sa mga ahensya sa gobyerno, mag-uuma sa cacao ug asosasyon, ug mga processors.
Si Consul Garcia mipadayag sa iyang kalipay ug pasalamat kay talagsaong higayon ra nga magkatapok ang tanang miyembro sa cacao industry.
Butyag niya, “we have to be united if you want to prosper as an industry. We are also positioning to be the producer of the best fermented cacao beans, not just in our country, but in the whole world.“
Midugang siya, nga makab-ot lang kini kung ang tanang mga lakang ug plano sa cacao naka-harmonize gikan sa production ngadto sa postharvest technology.
“We should also be inclusive, if adunay tanom nga cacao, miyembro ka sa industriya,” sigun niya bisan og pila ra kapunuan sa cacao ang gitanom.
Dugang ni Consul Garcia, nga ang mga chocolatier sa tibuok kalibutan adunay dakong panginahanglan og mga cacao beans. Ang nasud nga maoy mosuplay sa 70 porsento nga mga cacao beans adunay nasinati nga problema sa produksyon, mao nga adunay dakong panginahanglan. Iyang dugang, nga ang Pilipinas kay blessed kaayo kay adunay maayong klima nga haum sa cacao.
Si Department of Agriculture-Central Visayas (DA7) Dr. Wilberto O. Castillo, ang Regional Technical Director for Research and Regulations mipa-ambit nga ang DA padayon nga muhatag og tabang ang ngadto sa mga mag-uuma, kooperatiba, ug mga processor, ug hilabi na sa mga nanginahanglan ug solusyon sa ilang problema kalabot sa pagtanom og cacao.
Apil sa misaysay sa ilang suporta ang buhatan sa Landbank, Department of Labor and Employment, Department of Trade and Industry, Philippine Crop Insurance Corporation, Department Tourism, ug ang Lamac Multipurpose Cooperative.
