Usa ka Mobile Soil Laboratory truck alang sa rehiyon 7 naabot karong adlawa sa buhatan sa Department of Agriculture-Central Visayas (DA7) nga nagkantidad og Php 44 milyones nga kumpleto na sa mga gikinahanglan ekipo sa pag-eksamen sa yuta.
Ang sakyanan gidawat sa Integrated Laboratory Division (ILD) nga gipangunahan ni Norma Repol, ang hepe sa ILD.
Matag rehiyon sa nasud gigahinan og Mobile Soil Laboratory, mao ang rehiyon 7 adunay bahin. Base sa iyang hitsura, usa kini ka customize nga 10-wheeler nga trak nga kompleto sa mga modernong ekipo, kagamitan ug safety features. Ang maong mobile unit makahimo sa 44 ka lain-laing chemical, physical, ug microbiological nga soil tests. Kini nagtanyag og komprehensibo ug siyensyang pamaagi aron matabangan ang mga mag-uuma sa pagpaayo sa ilang yuta aron motaas balik ilang produksiyon ug pagpalig-on sa kalikupan.
Matod pa ni ILD Chief Norma Repol, “kining Mobile Soil Laboratory dalhon nato ngadto sa mga probinsya, labi na sa mga lugar nga daghan og tanom nga humay. Sa diha nga makakuha kita og mga sample gikan sa mga mag-uuma, diretso dayon nato kini ma-analyze kay kumpleto man kini sa mga laboratory test ug mga equipment.”
Dugang pa niya, naglaum siya nga madala kini una sa Bohol, ilabi na kay daghan didto og mga humayan.
