Sa pag-establisar sa 100-ektaryang corn technology demonstration farm alang sa Adaptive Balanced Fertilization Strategy project kon ABFS, mga mag-uuma sa amihanang lungsod sa Sugbo gipa-ubos sa technical briefing ug capacity building kabahin sa ABFS niadtong Hulyo 23-24, 2025.
Ang ABFS ubos sa National Soil Health Program (NSHP) sa Department of Agriculture – Bureau of Soils and Water Management (DA-BSWM) sa kolaborasyon sa DA-Central Visayas (DA7) ug ang Office of the Provincial Agriculture Cebu (OPA-Cebu).
Ang 52 ka mag-uuma nga gibansay sa ABFS sakop sa duha ka asosasyon- ang Purgason Maya Farmers Association (PurMaFA) sa Daanbantayan ug ang Libaong Young Community Association (LYCA) sa San Remigio.
Gihisgutan sa pagbansay mao ang protocol sa paggamit ng abono, teknolohiya sa produksyon sa yellow corn, mga peste ug dangan.
Sa pag-abono, girekomend ang 10 ka sako sa air dried chicken dung kon organic nga abono, 9 ka sako sa ammonium phosphate, 3 ka bags sa muriate of potash diin tungaon sa makaduha ang pagbutang niini, ug ang 2.75 bags sa urea nga ibutang 30 ka adlaw human sa pagtanom.
Ang Regional Crop Protection Center sa DA7, nihatag usab og panaghisgot kabahin sa mga peste, sakit ug dangan sa pagmaisan, samtang ang Philippine Crop Insurance Corporation (PCIC) mipadayag sa ka-importante sa pagpa-insured, dili lang sa mga pananom ug hayupan, lakip na ang kaugalingon.
Si Richard Yaun, Presidente sa Purgoso Maya Farmers Association (PURMAFA), nipadayag og pasalamat sa DA sa mga agri inputs nga gihatag, dili lang ang mga binhi ug abono, lakip na ang mga teknikal nga pagtudlo sama sa saktong pangabono nga mapa-ambit o mabilin pa sa sunod nga henerasyon.
Sa laing bahin, si Isidro Rosellosa, presidente sa Libaong Young Community Association, mi-asoy sa dakong kalahian sa ilang naandan nga pagpangabono og sa bag-ong stratehiya sa ABFS.
“Dako gyud og kalahian kay sa ABFS, pagturok palang daan sa mais, hangtod sa pagtubo, lig-on gyud kay sakto man sa pagpangabono,” matud pa ni Rosellosa.
Ang mga lokal nga kagamhanan sa duha ka lungsod, nipakita og dakong suporta sa mga kalihokan sa DA.
Aduna usab nahitabo nga Memorandum of Agreement (MOA) signing tali sa asosasyon ug sa DA-BSWM kabahin sa tagsa-tagsang responsibilidad.
