Pormal na nga giturn-over sa Department of Agriculture-Central Visayas (DA7) ang farmers trading post ngadto sa Local Government Unit-San Miguel, Bohol, kagahapon, Hulyo 31, 2025.
Mismo si DA7 Regional Executive Director Angel C. Enriquez, kauban si Regional Technical Director for Operations Engr. Cirilo N. Namoc, ang mitunol sa certificate of turnover ug ang yawe (key of ownership) nga gipasa ngadto sa LGU-San Miguel.
Ang farmers trading post nagkantidad og 10 milyones pesos (P10.0M) diin gipondohan kini sa DA-Agribusiness and Marketing Assistance Division.
Si San Miguel Mayor Hon. Ian Mendez, miasoy nga dugay na sila’ng nangandoy og farmers trading post/center aron aduna na sila’y haturan sa ilang mga abot ug sigurado na ang ilang kita.
Iya usab gipa-ambit nga adunay umaabot nga mga proyekto ang lungsod nga madawat gikan sa DA7 ug PhiMech, usa na niini ang mga makinarya para sa ilang ekta-ektaryang basakan diin daghang mag-uuma ang makabenepisyo.
Ang San Miguel nga adunay 8,000 ka ektaryang agricultural land, diin 3,000 ektarya niini alang sa humayan.
