“Nakita nako nga mas dagko ug daghan ang unod sa mga balanghoy kun mosunod kita sa mga binag-ong teknolohiya.”
Kini ang gipaambit ni Teresita Valor, nga taga-Maglinao, Basay Negros Oriental, usa sa mga benepisyaryo sa programa sa Department of Agriculture nga Kabuhayan at Kaunlaran ng Kababayang Katutubo (DA-4K), nga gibansay mahitungod balanghoy o Cassava Production.”
Sa gihimo nga project monitoring ngadto sa Bukidnon Magahat Indigenous Cultural Community, si Valor misaysay sa iyang nakitang kaayuhan human sila misanong sa gitudlo sa DA.
“Sa una ang pamaagi namo sa pagtanum kay pinahigda unya walay saktong sukod sa gilay-on, ang usa ka puno-an mo-unod lamang ug 4 ngadtos lima. Karon nga misunod nami sa bag-ong pamaagi sama sa gilay-on sa kada puno-an ug pinatindog na ang pagtanum, daghan na kaayo ang unod sa matag puno-an, mukabat na sa 7 ngadto sa 10 ka unod. Unya mas humok siyang ibton kumpara sa pinahigda”.
Ang mga miyembro sa indigenous people organization (IPO) sa Basay nakadawat og libreng cassava seed pieces ug abono (organic ug inorganic) basi sa ilang gipangayo sa buhatan kay matud pa nila, “mao kini ang among nag-unang panginabuhian”.
