Gipasidunggan sa lokal nga pangagamhanan sa probinsya sa Bohol ang mga mag-uuma ug mananagat sa ilang dakong kontribusyon nga molambo ang agrikultura ug panagatan, pinaagi sa ilang tinuig nga Suhid Awards nga gipahigayon karong adlawa, Hulyo 17, 2025, sa dakbayan sa Tagbilaran.
Sa tema, “Mga singot sa paningkamot sa makugihong kamot, Pasidunggan sa Hilabihang Kahimuot,” ang Suhid Awards nagtumong sa pag-ila ug paghatag og pasidungog sa mga indibidwal ug asosasyon nga nanguna sa nagkalain-laing laramg sa agrikultura ug panagatan.
Si Roman Dabalos, ang Agricultural Program Coordinating Officer (APCO)-Bohol sa Department of Agriculture-Central Visayas (DA7), mipa-ambit nga andam kanunay nga mohatag og suporta ang DA.
Sa mensahe ni 1st District Provincial Board Member Lucille Lagunay, sa ngalan ni Governor Erico Aristotle Aumentado, iyang gipasupot ang padayong suporta ug pagpalig-on sa sektor sa agrikultura ug panagat sa Bohol. Gibutyag niya ang katumanan sa Executive Order No. 1, Series of 2025, nga nagmando sa pagtukod sa Executive Planning Committee for Agricultural Renewal and Innovation Strategy.
Ang SUHID gipasiugdahan sa Provincial Government of Bohol pinaagi sa Office of the Provincial Agriculturist (PGBh-OPA), uban sa suporta sa Department of Agriculture Central Visayas (DA7), mga attached agencies sa DA, nagkalain-laing mga lungsod, ug sa aktibong partisipasyon sa mga mag-uuma ug mananagat.
