Mikabat na ngadto sa 619, 867 ka mga mag-uuma sa rehiyon 7 ang narehistro sa Registry System for Basic Sector in Agriculture (RSBSA) sa Department of Agriculture (DA), kutob sa (as of) June, 2025.
Kini ang gipresentar ni Cecille Opada, DA7 RSBSA Action Officer sa gipahigayon nga Mid-year Assessment sa RSBSA nga gihimo sa Dumaguete City, Negros Oriental karong semanaha, Hulyo 15-18, 2025.
Basi sa datus nga iyang gipakita, 96,883 kay mga farmer workers; 13, 696 agri youth; 7, 707 Indigenous People (IPs) ug 10, 908 mga Agrarian Reform Benficiaries (ARBs) ang malampusong narehistro sa database diin nagpasabot nga mas daghan na ang mga mag-uuma nga makabenipisyo sa programa sa pang-agrikultura
Si DA7 Regional Executive Director Angel Enriquez sa iyang mensahe online misaysay sa importansya ug kabug-aton sa RSBSA sa ahensya isip usa sa mga mahinungdanong himan (vital tool) sa pagpangandam sa plano sa agrikultura para sa kaayuhan sa mga mag-uuma.
Siya usab mihangyo nga unta iapil og ihap (inventory) ang mga farm machineries, farm equipments ug post harvest facilities nga anaa sa lugar kay aron mabagay (harmonize) ang imbentaryo sa makina ug gidaghanon sa mga mag-uuma. Iyang panghinaot nga unta sa kanatibukang resulta, adunay taas nga produksyon.
Ang gihimo nga ebalwasyon gitambungan ni Dr. Gerry Avila, hepe sa DA7 Field Operation Division ug uban nga mga staff sa DA7.
