Tulo ka asosasyon sa bukirang bahin sa Dalaguete, Cebu midawat og tagsa ka vermicompost sieving machine o ayaganan sa vermicompost karong adlawa, Hulyo 10, 2025 .

Gihimo ang turnover didto sa AMIA Village (Adaptation and Mitigation Initiative in Agriculture) sa Barangay Mantalongon.

Nagkantidad ang matag machine og P210,000 o ang kinatibuk-ang balor sa 3 ka machine nagkantidad og P630,000.00 nga gidawat sa Kapunungan sa mga Mag-uuma sa Sigpit (KAMSI), Lahug Mantalongon Farmers’ Association (LAMFA), ug Mantalongon Irrigators Association (MIA).

Sumpay sa kalihukan mao ang paglusad sa Sloping Agricultural Land Technology (SALT), usa kini ka teknolohiya sa pagpananum nga pinaagi sa contour farming, diin ang mga tanom isubay sa kurba sa yuta imbis nga paubos. Ang SALT usa ka kinaraan nga pamaagi nga hangtod karon epektibo ug gisuportahan gihapon sa modernong teknolohiya isip climate-resilient farming. Mohatag usab kini og oportunidad para sa diversified farming ug dugang kita sa mag-uuma.

Usa sa farmer-cooperator, si Ernie Tollente, nga mipahulam sa iyang yuta isip demo farm ug iyang kalipay nga nakasulay sa bag-ong pamaagi sa pagpananom.

Sa pakighinabi, si Ernie miingon nga excited siya sa resulta sa teknolohiya kay sukad pa kaniadto tradisyonal lang gyud ang iyang pamaagi sa pagpananom sa tagilid nga umahan. Nanghinaut siya nga adunay kalambuan nga makuha gikan niini.

Ubay-ubay na nga mga agri-inputs ang nahatag sa AMIA sa Mantalongon sama sa abono, plastic drum, plastic hose, mga liso alang sa multicropping, integration sa hayop, ug mga training ug seminar. Bisan pa man sa kalamidad, padayon gihapon ang produksyon sa mga mag-uuma tungod sa mga climate-resilient technologies nga gipatuman sa AMIA.

Sa courtesy call nga gihimo sa kawani sa Department of Agriculture-Central Visayas (DA7) kang Mayor Bembie Tambis sa Dalaguete, dako ang pasalamat sa mayor sa mga programa sa DA nga makatabang gyud sa mga mag-uuma.

Iyang gisaysay ang mga suliran sa mga mag-uuma nga iyang nnakita sa ilang lugar sama sa pagpas-an sa binakid nga produkto, lisod nga agianan o dalan, ug wala’y kontrol sa presyo sa ilang mga produkto sa merkado.

Isip sulbad, nangayo siya og tabang sa AMAD, mihimo og lakang sa mga mag-uuma sa pagparehistro sa RSBSA ug paghatag og schedule sa ilang pagtanum aron malikayan ang oversupply. Alang kaniya, kung stable ang supply, posible nga mahimong stable pud ang presyo.