Gitagaan og aksyon sa Department of Agriculture-Central Visayas (DA7) ang hangyo sa usa ka pribadong sektor nga mga liso sa utanon agi’g ilang komitment sa pagsaulog sa Nutrition Month (NM), karong adlawa, Hulyo 9, 2025.
Ang Cebu Velez Hospital, mipadala og sulat nga mihangyo sa DA nga mohatag og mga liso sa utanon isip suporta sa NM.
Ang mga liso gitunol sa usa ka simpol nga seremonya nga gihimo sa Velez Medical Arts Lobby sa Cebu City, nga gitambongan usab sa mga nagkadaiyang institusyon.
Ang mga liso sa utanon malipayong gidawat nila Mary Nheille D. Pasaje ug Mary Jane P. Elipian, mga empleyado sa Cebu Velez General Hospital,
“Kung naa mi lutuon, naa pud mi tamnon. Salamat kaayo sa DA, kay dinhi magsugod among healthy nga lifestyle,” matud pa ni Pasaje.
“Dapat magmatngon ta sa atong kaugalingon para kita lig-on ug himsog,” dugang pa ni Elipian.
Gipahimangnoan usab ni Natahlie Corinne Prado, usa ka Registered Nutritionist-Dietitian ug Project Development Officer sa National Nutrition Council Region 7, ang kamahinungdanon sa sakto nga pagkaon ug nutrisyon.
Gipasabot usab ni Chief Nurse Hazel T. Misa, RN, ang tema karong tuiga para sa Nutrition Month. Matud pa niya, “Ang adbokasiya importante kung unsa imong gihingugma buhaton.” Isip nurse, importante nga magpakita siya ug sakto nga ehemplo sa pagkaon ug pagpili sa healthy nga mga pagkaon.
Dako ang pasalamat sa Department of Agriculture sa imbitasyon sa Cebu Velez General Hospital. Nalipay ang DA nga nakaambit ug mga liso sa utanon alang sa mga doctors ug nurses—alang gihapon sa ilang maayong panlawas ug panginabuhi.
