Sa gihimo nga market linkage caravan tali sa mga grupo sa mag-uuma sa Bohol ug mga institutional buyers (IBs) nga gikan sa lain-laing lugar sa nasod, nga gipahigayon karong semanaha (Hulyo 2- 4, 2025), nasorpresa ang mga mag-uuma tungod sa kadako sa panginahanglan sa mga institutional buyers (IBs) sa mga produktong agrikultura.
Nasayran kini human nga mipresentar ang mga IBs sa ilang panginahanglan sama sa gidaghanon (volume), ang kalidad (quality) ug uban pang specification ngadto sa mga suppliers nga mag-uuma. Nangangha ang mga mag-uuma sa panginahanglan ug kun ila kining makab-ot, dako nga oportunidad nga molambo sila.
Sa presentasyon, daghang buyers ang gapangita og raw materials sama sa ube ug coconut products nga ilang gikinahanglan alang sa ilang mga produkto sama sa ice cream, rice porridge, ug uban pa.
Samtang ang mga mag-uuma mipakita sa ilang mga prodyus didto sa mga IBs nga ilang ka-estorya aron makabuo og memorandum of agreement (MOA) isip pormal nga kasabutan sa umaabot nga panag-uban sa negosyo.
Usa sa na-umol sa panaghisgot mao ang nga contract growing sa ubi, diin ang IBs maoy mohatag og inputs sama sa abuno ug mga panginahanglan sa tanom. Ig abot sa anihan, Ang IB na ang mopalit sa ubi ug ideduct na lang ang mga gastos sa inputs.
