Mga Oponganons o mga lumulupyo sa Lapulapu City, Cebu nakapahimulos sa pagbalik sa Kadiwa ng Pangulo (KNP) gahapon, Hunyo 26, 2025 diin presko ug barato nga mga abot sa agrikultura gibaligya.

Ang KNP gisalmotan sa duha (2) ka indibidwal ug siyam ka farmers’ cooperative and associations (FCA) diin direktang ibaligya sa mag-uuma ang ilang mga produkto sama sa gulay, prutas, ug uban pang produkto ngadto sa mga Oponganons -mga residente ug kawani sa City Hall.

Usa sa mga nakapalit sa KNP mao si Maricris Polos Hiyas sa City Health Office, nga matud niya ang Kadiwa usa ka paagi nga mas madali ilang pagpangumpra kay human sa trabaho, makapalit dayon siya og preskong gulay nga dili na kinahanglan moadto sa merkado.

Matud ni Shenji Lynn Casio, nga taga-Bangkal, usa sa mga mamalitay sa Kadiwa, nagkanayon nga mas kombinyente ang pagpamalit sa City Hall kay naa na ang tanan ug dili na kinahanglan nga mulugsong sa merkado. Para kaniya, ang Kadiwa dili lang praktikal kundi usa ka benepisyo sa mas daghang katawhan.

Moabot ang total nga halin og ₱68,066.00 sumala sa summary of sales report gikan sa mga FCAs.

Tumong sa KNP nga lig-onon ang linkage tali sa mag-uuma ug konsumidor. Kini nga inisyatiba, tabang sa lokal nga panggamhanan ug sa suporta sa komunidad, padayon kini nga maghatag ug oportunidad sa usa ka mas duol ug mas barato nga nga kapalitan sa pagkaon.