“Dili diay babag ang walay espasyo sa matag kabalayan aron makapananum og utanon nga kakuhaan og pagkaon.”
Kini maoy nakat-unan ni Lynie Ybañez, Presidente sa Barangay Azagra Livelihood Women’s Association (BALWA), nga lumolopyo sa Tanjay City, Negros Oriental nga mi-apil sa pagbansay kabahin sa Urban Vegetable Production.
Sa pakighinabi sa mga kawani sa Department of Agriculture-Central Visayas (DA7), sa mga partisipante gikan sa siyudad sa Canlaon, Guihulngan, Bais, Bayawan ug sa Tanjay, daku ilang pasalamat sa kahigayonan nga mabansay sila sa pagpananum og utanon gamit ang mga plastic nga basiyo, container ug uban pa.
Si Ybanez misaysay nga nalibog siya kon unsaon molambo ang mga tanom nga puro sementado man ang palibot, ug karon iya’ng nasayran nga pwede diay mahimong posible ang imposible kay pwede raman diay mananum gamit ang mga butang sama sa mga plastic container ug uban pa kay pwede ra ibitay.
“Momenos na unya ang akong gastos sa pagkaon sa panimalay kun aduna nakoy container garden., busa ako i-apply ang akong nakat-onan,” ni Ybanez pa.
Si Gerardo Galan, magtutudlo sa Jose Cardenas Memorial High School sa Canlaon City, mipa-ambit usab sa iyang kasinatian sa kalihukan. Matud niya karon iyang nakat-unan ang pag-ila sa mga dangan nga mapahimuslan ug dangan nga dautan diin maoy rason sa pagkunhod sa produksyon.
Mihimo sab og field exposure diin sila (partisipante) mismo ang mo-ila sa mga dangan nga amigo ug kaaway nga rason nga mokunhod ang produksyon.
