“Ang pagdagsang sa peste ug dangan dinhi sa among lugar maoy dakung hagit namong mga mag-uuma sa mais. Salamat nga giari mi aron i-monitor ang kahimtang sa among kamaisan.”
Kini ang kasinatian nga gipa-ambit ni Herardo E. Quijano, usa ka mag-uuma sa Brgy. Cabangbang, Bantayan, Cebu sa pakighinabi nila (mag-uuma) sa mga kawani sa Department of Agriculture-Central Visayas (DA7). Iyang gisaysay nga sa iyang duha’g tunga ka ektarya (2.5 hectare) nga kamaisan, gidagsa kini sa peste nga niresulta sa walay ani, ingon man pagka-alkansi nya.
“Among.gipaningkamot nga mousbaw ang ani sa maisan, apan napakyas tungod sa walay gipiling kadaut nga gidala ining peste. Gisuwayan namo og tambal, apan hangtod karon, padayon gihapon ang among pakigbisog aron mapugngan ang pagkuyanap sa maong peste sa tibuok ektarya nga yuta.”
Aron matabangan ang mag-uuma sa mais diha sa isla sa Bantayan, gitudluan sa DA7’s Regional Crops Protection Center (DA7- RCPC) ang 17 ka mga asosasyon sa mag-uuma kabahin sa Integrated Pest Management (IPM) aron mapalapdan ang ilang kahibalo, pag-ila, pagpugong ug pagdumala sa mga peste ug dangan nga mitumaw ug dagsang sa maisan.
Matud sa eksperto sa RCPC7, ang Hunyo ug Hulyo maoy kritikal nga bulan diin sagad manggawas ang mga peste ug dangan.
